Կանանց ռեսուրսային կենտրոնի գործունեության հիմնական ուղղություններից է ֆեմինիստական ակտիվիզմը։ Ծավալելով ֆեմինիստ ակտիվիստական գործունեություն՝ Կանանց ռեսուրսային կենտրոնը փորձում է նպաստել ֆեմինիստական շարժման ծավալմանը և հայիշխանական համակարգի տապալմանը։ Նպատակ ունենալով բարձրաձայնելու կանանց հիմնախնդիրները և նպաստելու դրանց լուծման գործընթացին՝ ԿՌԿ-ն իրականացնում է մի շարք ակցիաներ, միջոցառումներ, դասընթացներ ու քննարկումներ:
Մեզ համար նաև շատ կարևոր է ապահով տարածքի ստեղծումը: Այն ներառում է ոչ միայն ֆիզիկական տարածքը, որից կարելի է օգտվել սովորելու, աշխատելու, ազատ ժամանակն անցկացնելու համար, այլև այն ապահովությունը, որը կարելի է ստանալ հավասար, աջակցող, կարեկցող և քննադատությունից զերծ միջավայրում:
Կանանց ռեսուրսային կենտրոնի նպատակներից է կանանց զորեղացումը կրթության և համայնքային քննարկումների միջոցով: Այդ իսկ պատճառով մենք մեր գործունեության երկար տարիների ընթացքում մշակել, ստեղծել և անցկացրել ենք բազում դասընթացներ, որոնցից ամենամեծն ու ընդգրկունը Կանանց իրավունքների եռօրյա դասընթացն է:
Ընտրված մասնակիցները երեք օրերի ընթացքում ծանոթանում են հետևյալ թեմաներին՝ մարդու իրավունքներ, գենդեր և գենդերային ինքնություն, գենդերային բռնություն, ֆեմինիզմ, սեռական և վերարտադրողական առողջություն և իրավունք, խաղաղաշինություն: Բոլոր հանդիպումներին մասնակցած անձինք հնարավորություն են ստանում իրենց գաղափարներով դիմելու փոքր դրամաշնորհի և իրենց համայնքներում իրականացնելու ադվոկացիոն ծրագրեր, որոնք կարող են ունենալ տարբեր ձևաչափ և բովանդակություն՝ դասընթացներ, աշխատարաններ, թատերական ներկայացումներ, ֆոտո և վիդեո պատմություններ, սեղանի խաղեր և այլն:
Ինչպես նաև, անցկացվում են տարբեր ֆեմինիստական քննարկումներ, վերապատրաստումներ դասընթացավարների համար և այլ ինֆորմացիոն ծրագրեր։
Ապահով տարածքը բաց է բոլորի համար, ովքեր կարիք ունի տեղեկատվության, աջակցության և խորհրդատվության: Մեր մասնագետները լսում են յուրաքանչյուր այցելուի, գնահատում կարիքները, տրամադրում անհրաժեշտ տեղեկատվություն, ինչպես նաև, անհրաժեշտության դեպքում, ուղղորդում դեպի համապատասխան կազմակերպություններ և մասնագետներ։
Մենք բաց ենք երկուշաբթիից շաբաթ՝ բացի չորեքշաբթի օրերից, ժամը 14:00-ից 19:00: Այն ազատ է աշխատելու, սովորելու, մեր գրադարանից օգտվելու և աշխատակիցների հետ շփվելու համար: Այստեղ անցկացնում ենք կինոդիտումներ, գրքերի քննարկումներ, տարբեր միջոցառումներ, որոնք ուղղված են մասնակիցների բարօրության և հոգեկան առողջության բարելավվմանը:
«Աղջիկները խոսում են» երկամսյա ծրագիրը նախատեսված է 13-ից 18 տարեկան դեռահաս աղջիկների համար։ Ծրագրի նպատակն է դեռահաս աղջիկների զորեղացումը, շփման և ինքնազարգացման համար ապահով տարածքի ստեղծումը։
Հանդիպումների ընթացքում մասնակիցները հնարավորություն են ունենում կիսվելու իրենց գիտելիքներով, քննարկելու հասարակությունում երիտասարդ աղջիկների դերը, խնդիրները, նպատակներն ու ձգտումները։ Քննարկումներն ուղղված են մասնիկիցների մոտ բարձր ինքնագնահատականի և առաջնորդության հմտությունների ձևավորմանը։
Կարևոր է նշել նաև, որ ծրագրի ավարտից հետո մասնակիցների կապը ԿՌԿ-ի հետ չի ավարտվում: Աղջիկները հնարավորություն են ունենում միանալու Կանանց ռեսուրսային կենտրոնի դեռահաս աղջիկների խմբին, որի համար պարբերաբար հանդիպումներ և քննարկումներ են կազմակերպվում: Աղջիկները նաև հնարավորություն ունեն սկսելու սեփական նախաձեռնությունները և Կանանց ռեսուրսային կենտրոնի կողմից ստանալու աջակցություն դրանք իրականացնելու համար:
«Աղջիկները խոսում են» նախաձեռնությունը դեռահաս աղջիկների նախաձեռնած գաղափարներից ամենահաջողվածն է: Նախաձեռնությունը ստեղծվել է 2018թ-ին և նպատակ ունի արվեստի (art-activism-ի) միջոցով տեսանելի դարձնելու այն խնդիրները, որոնց կարող են առնչվել մեր կողքին ապրող աղջիկներն ու կանայք: Նախաձեռնության ֆեյսբուքյան էջը:
«Աղջիկները խոսում են» նախաձեռնության և «Կանանց ձայն» ռադիոալիքի համագործակցության արդյունքում ստեղծվեց «Աղջիկները խոսում են» փոդքասթը: Փոդքասթի նպատակն է աուդիո պատմությունների միջոցով ներկայացնել աղջիկների և կանանց հիմնախնդիրները, անդրադառնալ մեր հասարակությունում առկա գենդերային կարծրատիպերին և փորձել ներկայացնել երիտասարդ աղջիկների տեսակետը վերոհիշյալ թեմաների վերաբերյալ: Լսեք փոդքասթը այստեղ:
2019թ․-ից սկսած՝ Կանանց ռեսուրսային կենտրոնն իրականացնում է ամենամյա «Աղջիկների զորեղացման ճամբար», որի նպատակն է 18-25տ. աղջիկների համար ստեղծել ապահով միջավայր, որտեղ նրանք կարող են խոսել ֆեմինիզմի, սեռականության, հայրիշխանական համարգի ազդեցության և իրենց առօրյա խնդիրների մասին: Ինչպես նաև, անցկացվում են մարզային կարճաժամկետ արտ-ակտիվիստական ճամբարներ, որոնց ընթացքում մասնակիցների հետ քննարկում ենք, թե ինչպես խնդիրների մասին կարելի է բարձրաձայնել արվեստի միջոցով: Դրան հաջորդում է գործնական մասը, երբ մասնակիցները իրենց գաղափարները վերածում են գրաֆիտիների՝ պատկերելով դրանք քաղաքի տարբեր հատվածներում:
«Կանանց ռեսուրսային կենտրոն» ՀԿ-ն շատ է կարևորում կամավորների դերը իր գործունեության մեջ: Մեզ մոտ կարող են կամավորություն իրականացնել ինչպես տեղացի, այնպես էլ միջազգային կամավորները:
Կանանց ռեսուրսային կենտրոնում կամավորելով՝ դուք հնարավորություն եք ստանում մասնակցելու կենտրոնում իրականացվող ծրագրերին, ունենալու ձեր ներդրումը Հայաստանում ֆեմինիստական շարժման և կանանց հիմնախնդիրների լուծմանն ուղղված գործողություններում: ԿՌԿ կամավորները նաև հնարավորություն ունեն նախաձեռնելու սեփական գաղափարները և ստանալու աջակցություն դրանք իրականացնելու համար:
Կանանց ռեսուրսային կենտրոնում կամավորելու համար անհրաժեշտ է լրացնել կամավորության հայտը:
Միջազգային կամավորներին թիմում ներառելու համար Կանանց ռեսուրսային կենտրոնը համագործակցում է նաև այլ կազմակերպությունների հետ, որոնք կապող օղակ են հանդիսանում ԿՌԿ-ի և միջազգային կամավորի միջև:
Կանանց ռեսուրսային կենտրոնում պարբերաբար անցկացվում են խմբային հանդիպումներ հոգեբանի հետ: Ինչպես նաև, ժամանակ առ ժամանակ անցկացվում են մեկանգամյա խմբային բաց հանդիպումներ հոգեբանի հետ՝ նախօրոք որոշված թեմայով:
Կանանց ռեսուրսային կենտրոնը կանանց տրամադրում է ԱՆՎՃԱՐ իրավաբանական խորհրդատվություն՝ ամուսնաընտանեկան փոխհարաբերությունների և աշխատանքային իրավունքների ոլորտներում:
Մի՛ կորցրու մեր վերջին նորությունները, նախաձեռնությունները, կանանց պատմությունները և առաջիկա միջոցառումները։ Միայն մեկ սեղմումով կմիանաս մեր աջակցող համայնքին։
